Frå 1. mai blir vegen inn mot Blåfalli-vassdraget opna for ferdsel etter vinteren. Da opnar Sunnhordland kraftlag (SKL) bommen ved Ågotelv. Det er fleire samanfallande, store utbyggingsprosjekt i området, mellom anna Blåfalli Fjellhaugen Kraftverk og linjebygging av Statnett og Fagne. Av den grunn vil det framleis vera nokre avgrensingar for ferdsel, som er knytt til anleggsaktiviteten.
– Trafikantar må dessverre rekna med redusert framkome og mellombelse reguleringar når dei ferdast i vassdraget. Det er innført fartsavgrensingar, og etter kvart blir det etablert høgdeavgrensing på vegen etter avkøyrsel til Fjellhaugen skisenter, seier Kjetil Heimvik, prosjektleiar i SKL.
Avgrensingane blir innført for å redusera risiko knytt til ålmenn ferdsel i møte med anleggstrafikk.
I enkelte periodar kan Blådalsvegen bli heilt stengd i inntil eitt døgn av omsyn til særskilde anleggsoperasjonar eller tryggleik. Eventuelle stengingar vil bli varsla så langt det er mogleg på SKL si heimeside.
I Vetrhus-området foregår det omfattande massetransport i bratt terreng. Vegen til Vetrhus kan derfor, på relativt kort varsel, bli stengt i periodar på fleire timar frå begge sider. Alle som ferdast i området blir oppmoda om å følgja skilting og anvisingar.
– Me har forståing for at desse tiltaka er omfattande og gir ulemper for besøkande i området. For SKL kjem tryggleiken til alle trafikantar først, det er avgjerande at me sikrar dei. Og så ønsker me at anleggsdrifta kan gjennomførast på ein effektiv måte slik at anleggsperioden blir så kort som mogleg. SKL har god dialog med beitelag, hytteeigarar, breførarlag og andre som har særskilte interesser i vassdraget, om tiltak som kan legga betre til rette for dei. Målet er å finne løysingar som tek omsyn til både tryggleik, tilkomst og aktivitet i området, seier Kjetil Heimvik.
Oppdatert informasjon blir publisert løpande på SKL si heimeside og sendast til lokal presse.
